انٹرنیشنل کرکٹ کونسل کے ایوارڈ یافتہ معروف پاکستانی امپائرعلیم ڈار نے ڈومیسٹک امپائرنگ سے بھی ریٹائرمنٹ کا اعلان کردیا ہے۔
نجی ٹی وی اکی رپورٹ کے مطابق پاکستانی امپائرعلیم ڈار 25-2024 کے ڈومیسٹک سیزن کے اختتام پرامپائرنگ سے ریٹائرمنٹ ک اعلان کر دیں گے۔
علیم ڈار کا کہنا ہے کہ اب میں سماجی کاموں اوراسپتال کے منصوبے پرتوجہ دینا چاہتا ہوں،تاہم لوکل امپائرز کی رہنمائی کے لیے ہر وقت میسر رہوں گا۔
خیال رہے کہ علیم ڈار کا شاندار کریئر ایک چوتھائی صدی پر مشتمل ہے،وہ آئی سی سی امپائر آف دی ایئر (2009-2011) کیلئے ڈیوڈ شیفرڈ ٹرافی 3 بار اپنے نام کر چکے ہیں۔
یاد رہے کہ 56 سالہ علیم ڈار نے 1986 سے 1998 کے درمیان 17 فرسٹ کلاس اور 18 لسٹ اے میچز میں اپنی خدمات انجام دیں،انہوں نے 1998 کی قائداعظم ٹرافی کے دوران فرسٹ کلاس امپائرنگ سے اپنے کرئیر کا آغاز کیا،2003 سے 2023 تک انہوں نے امپائرز کے آئی سی سی ایلیٹ پینل میں بھی اپنی خدمات انجام دیں،جہاں انہوں نے اپنی انتظامی مہارت، کھیل کے حالات کی صحیح سمجھ بوجھ ،پرسکون اور بااخلاق رویے اور شاندار فیصلہ سازی کیلئے عالمگیر شہرت حاصل کی۔
واضح رہے کہ علیم ڈار نے ابتک ریکارڈ 145 ٹیسٹ، 231 ون ڈے انٹرنیشنل، 72 ٹی20 انٹرنیشل، 5 ویمنز ٹی20 انٹرنیشنل، 181 فرسٹ کلاس میچز، اور 282 لسٹ اے میچز میں امپائرنگ کی خدمات انجام دی ہیں۔