بابر اعظم کے بعد اگلا کپتان کون؟

ذرائع کے مطابق بابر اعظم کی دستبرداری کے بعد قومی وائٹ بال ٹیم کی کپتانی کیلئے 3 کھلاڑی ہاٹ فیورٹ قرار دیے جارہے ہیں۔

کرکٹ شائقین کے ذہن و دماغ میں سب سے بڑا سوال یہ ہے کہ اب قومی وائٹ بال ٹیم کی باگ ڈور کس کے ہاتھ میں تھمائی جائے گی؟اسی تناظر میں وکٹ کیپر اور بہترین بلےباز محمد رضوان اور فاسٹ بولر شاہین آفریدی کے حوالے سے اطلاعات موصول ہورہی ہیں کہ ان کے کپتان بننے کے امکانات بہت کم دکھائی دے رہے ہیں،البتہ ٹیسٹ ٹیم کے نائب کپتان سعود شکیل، جارح مزاج اوپنر فخر زمان اور آل راؤنڈر سلمان علی آغا کے نام یہ ذمے داری سونپنے کیلئے زیرغور ہیں۔

یاد رہے کہ سعود شکیل کو بنگلا دیش کیخلاف 2 ٹیسٹ کی سیریز میں وکٹ کیپر محمد رضوان کی جگہ بطور نائب ٹیسٹ کپتان شان مسعود کی کپتانی میں سامنے لایا گیا تھا،دوسری جانب فخر زمان بھی پاکستان سپر لیگ میں لاہور قلندرز کی قیادت کے فرائض سر انجام دے چکے ہیں۔البتہ آل راؤنڈر سلمان علی آغا نے ڈومیسٹک سطح پر تاحال کپتانی کے فرائض انجام نہیں دیئے۔

خیال رہے کہ بابر اعظم گزشتہ سال ورلڈکپ میں شکست کے بعد نومبر میں تینوں فارمیٹس کی کپتانی سے دستبر دار ہو گئے تھے،جس کے بعد پاکستان کرکٹ بورڈ نے شاہین شاہ آفریدی کو ٹی ٹوئنٹی اور شان مسعود کو ٹیسٹ کا کپتان نامزد کر دیا تھا،تاہم ون ڈے کے کپتان کے حوالے سے کوئی فیصلہ نہیں کیا گیا تھا،لیکن پھر رواں سال مارچ میں بابر اعظم کو دوبارہ سے پاکستان کی وائٹ بال کرکٹ کا کپتان بنادیا گیا تھا اور اب وہ پھر کپتانی سے مستعفی ہوگئے ہیں۔

 

Leave a Comment