بنگلا دیش میں کرکٹر شکیب الحسن اور اداکار فردوس احمد کے خلاف قتل کا مقدمہ درج کرلیا گیا۔
تفصیلات کے مطابق کرکٹر شکیب الحسن اور فردوس احمد کو مقتول روبیل کے قتل کے مقدمے میں نامزد کیا گیا ہے۔ مقتول کے والد رفیق الاسلام نے ڈھاکا کے ادابور تھانے میں شکیب اور فردوس کو نامزد کیا۔ کرکٹر شکیب الحسن اور اداکار فردوس پارلیمنٹ کے رکن تھے۔ شکیب الحسن پاکستان کا دورہ کرنے والے بنگلہ دیشی ٹیسٹ سکواڈ کا حصہ ہیں۔
بنگلا دیشی میڈیا کے مطابق شکیب الحسن پر گارمنٹ فیکٹری کے ملازم کے قتل کا الزام ہے۔
یاد رہے کچھ روز قبل بنگلادیش کی سابق وزیر اعظم شیخ حسینہ سمیت عوامی لیگ کے 108 رہنماؤں اور کارکنوں کے خلاف قتل کا مقدمہ درج کیا گیا تھا۔ حسینہ واجد اور دیگر افراد کو 16 جولائی کوچٹاگانگ میں ہونے والے مظاہروں کے دوران اسٹوڈنٹ ونگ کے رہنما وسیم اکرم کی ہلاکت کے مقدمے میں نامزد کیا گیا۔
رپورٹس میں بتایا گیا ہے کہ شیخ حسینہ اور دیگر کے خلاف مقدمہ چٹاگانگ کے پنچلیش پولیس اسٹیشن میں درج کیا گیا۔ شیخ حسینہ سمیت عوامی لیگ کے رہنماؤں کے خلاف مقدمہ مقتول وسیم اکرم کی والدہ نے درج کروایا۔
اس مقدمے میں شیخ حسینہ کے ساتھ عوامی لیگ کے جنرل سیکرٹری عبیدالقادر، سابق وزیر خارجہ حسن محمود، سابق وزیر تعلیم محب الحسن چوہدری، چٹاگانگ سٹی کارپوریشن کے میئر رضا الکریم ، چٹاگانگ میٹرو پولیٹن عوامی لیگ کے جنرل سیکرٹری اے جے ایم ناصر الدین سمیت کئی اعلیٰ شخصیات کے نام شامل ہیں