ترکیہ سے تعلق رکھنے والے معروف مذہبی رہنما فتح اللہ گولن انتقال کر گئے۔
غیر ملکی میڈیا کے مطابق، ترکیہ کے معروف مذہبی رہنما فتح اللہ گولن امریکا میں انتقال کر گئے ہیں، 83 سالہ گولن 1999 سے امریکا میں خود ساختہ جلاوطنی کی زندگی گزار رہے تھے۔
فتح اللہ گولن ایک معتدل اسلامی تحریک کے بانی تھے جسے ہزمت یا خدمت تحریک کہا جاتا ہے، یہ تحریک زندگی کے مختلف شعبوں میں خدمات انجام دیتی ہے، گولن نے اپنے نظریات کو پھیلانے کے لیے ترکیہ سمیت دنیا کے 100 سے زائد ممالک میں سکولوں کا نیٹ ورک قائم کیا تھا۔
گولن پر 2016 میں فوج کی ناکام بغاوت کے بعد ترک صدر طیب اردوان کے خلاف بغاوت کا الزام عائد کیا گیا تھا، جس کے بعد گولن کی تنظیم پر پابندی عائد کر کے ترکی میں اس سے وابستہ ہزاروں افراد کو گرفتار بھی کیا گیا۔
فتح اللہ گولن نے الزامات کی تردید کرتے ہوئے کہا تھا کہ ان کی تحریک نے 50 سالوں کے دوران کئی بار فوجی بغاوتوں کا سامنا کیا ہے اور فوجی بغاوتوں کا مقابلہ کرنے والوں پر ایسا الزام لگانا توہین آمیز ہے۔