پاکستان کی ون ڈے اور ٹی ٹونٹی ٹیم کے ہیڈ کوچ گیری کرسٹن کے عہدے سے استعفیٰ دینے کے بعد اب جیسن گلیسپی کو وائٹ بال کرکٹ ٹیم کا عبوری ہیڈ کوچ مقرر کردیا گیا ہے۔
ذرائع کے مطابق آسٹریلیا سیریز میں جیسن گلیسپی کو عبوری ہیڈ کوچ مقرر کردیا گیا ہے، 49 سالہ جیسن گلیسپی کو آسٹریلیا کیخلاف ون ڈے اور ٹی ٹونٹی میچز کی اضافی ذمہ داری سونپی گئی ہے۔
نجی ٹی وی جیو نیوز کے مطابق گیری کرسٹن کے استعفے کے بعد نئے وائٹ بال کوچ پر مشاورت کی گئی ہے اور سابق ٹیسٹ کرکٹر عاقب جاوید کے ساتھ پی سی بی کے معاملات آخری مراحل میں داخل ہوچکے ہیں۔ خیال رہے کہ عاقب جاوید سلیکشن کمیٹی کے رکن ہیں اور لاہور قلندرز کے ہیڈ کوچ اور ڈائریکٹر کرکٹ آپریشنز بھی رہ چکےہیں۔ ذرائع کا بتانا ہے کہ چیئرمین پی سی بی محسن نقوی نے گیری کرسٹن کے رویے کو دیکھتے ہوئے نیا کوچ ڈھونڈنے کا ٹاسک دے دیا تھا۔
ذرائع پی سی بی کے مطابق شارٹ لسٹ میں لوکل کوچز بھی شامل ہیں جب کہ پی سی بی کی مینٹورز پر بھی نظریں ہیں، لوکل کوچز سے معاملات حل ہوگئے تو ان میں سے بھی ہیڈ کوچ لگایا جاسکتا ہے۔