دوسرا ٹیسٹ: بابر ، نسیم اور شاہین ٹیسٹ ٹیم سے ڈراپ، سرفراز احمد کو بھی سکواڈ سے ریلیز کردیا گیا

انگلینڈ کے خلاف دوسرے ٹیسٹ کیلئے سابق کپتان بابراعظم اور وکٹ کیپر بیٹر سرفراز احمد کو ریلیز کردیا گیا۔ ایکسپریس نیوز کے مطابق بابر اعظم کی جگہ کامران غلام کو موقع دینے پر اتفاق کیا گیا ہے جب کہ سرفراز احمد کے متبادل کے طور پر حسیب اللہ خان سکینڈ وکٹ کیپر کے طور پر ٹیم کا حصہ بنیں گے۔ انگلینڈ کیخلاف پلئینگ الیون کا اعلان بھی وقت کیا جاسکتا ہے۔
ذرائع کے مطابق نئی تشکیل شدہ سلیکشن کمیٹی نے 15 اکتوبر سے شروع ہونے والی سیریز کیلئے فہرست کو حتمی شکل دے دی ہے، اس فہرست میں 2 تجربہ کار سابق کپتانوں سرفراز احمد اور بابر اعظم کا نام شامل نہیں۔ سلیکشن کمیٹی کی جانب سے دونوں تجربہ کار کھلاڑیوں کی جگہ نوجوانوں کو آگے لانے کا فیصلہ کیا گیا ہے۔
فاسٹ بولر نسیم شاہ اور شاہین آفریدی کو بھی ڈراپ کردیا گیا، اسکواڈ میں کپتان شان مسعود ، سعود شکیل ، عبداللہ شفیق ، عامر جمال شامل ہیں۔
اس کے علاوہ حسیب اللہ ،کامران غلام ، مہران ممتاز ، میر حمزہ ، محمد علی بھی اسکواڈ میں شامل ہیں۔ 16 رکنی اسکواڈ کا محمد ہریرہ ، محمد رضوان ، نعمان علی ، صائم ایوب ، ساجد خان اور سلمان علی آغا بھی حصہ ہیں۔ قبل ازیں خبریں سامنے آئیں تھی کہ کامران غلام، حسیب اللہ، مہران ممتاز اور مبصر خان کے علاوہ اوپنر امام الحق کو بھی ٹیم کا حصہ بنائے جانے کا امکان ہے۔