راولپنڈی ٹیسٹ میچ کے پہلے دن پہلی اننگز میں 16 رنز پر 3 وکٹیں گنوانے کے بعد پاکستان ٹیم بنگلادیش کے خلاف کھیل میں واپس آگئی۔ پاکستان نے اننگز کا آغاز کیا تو اوپنر عبداللہ شفیق 2، کپتان شان مسعود 6 رنز اور بابر اعظم صفر کی خفت سے دوچار ہوکر پویلین لوٹ گئے۔ تین وکٹیں جلد گنوانے کے بعد اوپنر صائم ایوب اور نائب کپتان سعود شکیل نے ذمہ دارانہ بیٹنگ کرتے ہوئے ٹیم کا اسکور 114 رنز تک پہنچایا۔
اس دوران سعود شکیل نے اپنے ٹیسٹ کیریئر میں 1000 رنز بھی مکمل کرلیے۔ انہوں نے کم ترین اننگز میں 1000 ٹیسٹ رنز مکمل کرنے کا سعید احمد کا 65 سالہ ملکی ریکارڈ برابر کیا۔ دونوں کھلاڑیوں نے 20،20 اننگز کھیل کر یہ اعزاز اپنے نام کیا ۔
صائم ایوب نے ٹیسٹ کرکٹ میں اپنی پہلی نصف سنچری سکور کی، وہ 56 رنز بنا کر آئوٹ ہوئے ۔ اس سے قبل راولپنڈی میں کھیلے جارہے سیریز کے پہلے ٹیسٹ میچ میں بنگلادیشی کپتان نجم الحسن شانتو نے ٹاس جیت کر پہلے فیلڈنگ کرنے کا فیصلہ کیا، انہوں نے کہا کہ کوشش کریں اوور کاسٹ کنڈیشنز کا فائدہ اٹھاکر گرین شرٹس کی جلد وکٹیں حاصل کریں۔
اس موقع پر کپتان شان مسعود نے کہا کہ ٹاس جیتے تو فیلڈنگ ہی کا فیصلہ کرتے تاہم کوشش ہوگی بورڈ پر بڑا اسکور کھڑا کرکے بنگال ٹائیگرز کے بالرز کو پریشر میں لائیں۔ قبل ازیں ٹیسٹ میچ کے آغاز سے قبل باعث گیلی آؤٹ فیلڈ سے ٹاس تاخیر کا شکار رہا تاہم بعد ازاں امپائرز نے گراؤنڈ کی صورتحال کو دیکھتے ہوئے مقامی وقت کے مطابق دوپہر 2 بجے ٹاس اور کھیل کا آغاز 2:30 بجے کرنے کا فیصلہ کیا۔
امپائرز نے مشاورت کے بعد پہلے دن کا کھیل 48 اوورز تک محدود کردیا ہے جبکہ چائے کا وقفہ محض 20 منٹ کا ہوگا اور میچ شام 6 بجے تک کھیلا جائے گا۔ دوسری جانب امپائرز نے میچ میں تاخیر کی وجہ سے کھانے کا وقفہ بھی جلدی کردیا تھا تاکہ میچ کا تسلسل قائم رکھا جاسکے۔ واضح رہے کہ پاکستانی ٹیم بنگلادیش کے خلاف پہلے ٹیسٹ میچ میں 4 فاسٹ بولرز کے ساتھ میدان میں اترے گی۔ گزشتہ روز دونوں ٹیموں کے کپتانوں شان مسعود اور نجم الحسن شانتو نے ٹرافی کی رونمائی کی تقریب میں حصہ لیا تھا۔ پاکستان کا اسکواڈ: کپتان شان مسعود، نائب کپتان سعود شکیل، عبداللہ شفیق، بابراعظم ، خرم شہزاد ، محمد علی، محمد رضوان، نسیم شاہ، صائم ایوب، سلمان علی آغا اور شاہین شاہ آفریدی
راولپنڈی ٹیسٹ ، 3 وکٹیں جلد گنوانے کے بعد پاکستان کی میچ میں واپسی
