روی ایشون بابراعظم کا ویرات کوہلی سے موازنہ کرنے پر ناخوش

بھارتی سپنر روی چندرن ایشون نے پاکستانی سٹار بابر اعظم کا ویرات کوہلی سے موازنہ کرنے پر ناخوش ہوگئے۔ یوٹیوب چینل پر گفتگو کرتے ہوئے بھارتی ٹیسٹ سپنر روی چندرن ایشون نے قومی ٹیم کے سابق کپتان بابر اعظم کے مداحوں کو مشورہ دیا کہ دونوں بیٹرز کا ایک ہی سانس میں ذکر نہیں کرنا چاہیے۔ انہوں نے بابر اعظم کی صلاحیتوں کا اعتراف کرتے ہوئے کہا کہ میں واقعی انہیں بہترین کھلاڑی کے طور پر درجہ دیتا ہوں لیکن ویرات کوہلی کا اسٹیٹس بلکل الگ ہے، بابر نے کوہلی ریکارڈز ضرور توڑے ہیں تاہم مجھے لگتا ہے اگر کوہلی کیساتھ کسی کا موازنہ بنتا ہے تو وہ جو روٹ ہیں۔
ویرات کوہلی نے 2008ء سے اب تک 535 بین الاقوامی میچوں میں 53.23 کی اوسط سے 27,041 رنز بنائے ہیں جن میں 80 سنچریاں اور 140 نصف سنچریاں شامل ہیں جب کہ ان کا بہترین اسکور 254* رنز ہے۔
دوسری جانب 2015ء میں بین الاقوامی کرکٹ میں ڈیبیو کرنے والے بابر اعظم 294 میچوں میں 47.54 کی اوسط سے 13,836 رنز بنا چکے ہیں ، انہوں نے اہم پیشرفت کی ہے لیکن وہ اب بھی کوہلی کی سطح پر نہیں ہیں۔ ان کے ون ڈے کے اعدادوشمار 117 ون ڈے میچوں میں 56.72 کی اوسط سے 19 سنچریوں کے ساتھ 5,729 رنز کے متاثر کن ہیں لیکن موجودہ فارم تشویش کا باعث ہے۔ ٹیسٹ کرکٹ میں بابر کا آخری 50 پلس سکور دسمبر 2022ء میں آیا اور انہوں نے حال ہی میں اپنی آخری 18 ٹیسٹ اننگز میں صرف 20.33 کی اوسط سے 366 رنز بنائے ہیں ۔