سعودی حکومت کی جانب سے بیرون ملک سے آنے والے مسافروں کیلئے صحت سے متعلق نئی سفری ہدایات جاری کر دی ہیں۔
تفصیلات کے مطابق گردن توڑ بخار سمیت متعدد بیماریوں کی ویکسین لگوانا سعودی عرب آنے والے مسافروں کیلئے ضروری قرار دے دیا گیا ہے۔
سعودی سول ایوی ایشن اتھارٹی نے دنیا بھر کی تمام ایئر لائنز کو ہدایات جاری کرتے ہوئے کہا ہے کہ مسافروں کو سعودی عرب روانگی سے قبل لازمی ویکسینیشن کروانے کی پابندی کو یقینی بنایا جائے۔
جاری کردہ ہدایات کے مطابق مسافروں کے پاس ویکسینیشن سرٹیفکیٹ ہونا ضروری ہے، جو آمد سے کم از کم 10 دن پہلے جاری کیا گیا ہو۔
سرٹیفکیٹ کے حوالے سے واضح کیا گیا کہ پولی سیکرائیڈ ویکسین کا سرٹیفکیٹ 3 سال سے زیادہ پرانا نہ ہو، جبکہ کنجوگیٹڈ ویکسین کیلئے یہ مدت 5 سال مقرر کی گئی ہے۔ ایک سال یا اس سے کم عمر کے بچوں کو اس ویکسین سے مستثنیٰ قرار دیا گیا ہے۔
سعودی وزارت صحت نے ان ہدایات کو اپنی ویب سائٹ پر بھی جاری کیا ہے، تاکہ مسافر تفصیلات سے آگاہ رہ سکیں۔ ایئر لائنز کو یہ بھی ہدایت دی گئی ہے کہ وہ سفر کے دوران تمام ضروری احتیاطی تدابیر پر عمل درآمد کو یقینی بنائیں۔
سعودی سول ایوی ایشن نے خبردار کیا ہے کہ ان ہدایات کی خلاف ورزی کرنے والی ایئر لائنز اور مسافروں کیخلاف قوانین کے تحت کارروائی کی جائے گی۔
سعودی حکومت کے ان اقدامات کا مقصد ملک میں صحت کے معیار کو برقرار رکھنا اور مہلک بیماریوں کے پھیلاؤ کو روکنا ہے۔ مسافروں کو مشورہ دیا گیا ہے کہ وہ سفر سے پہلے اپنی ویکسی نیشن مکمل کروا کر ہدایات پر عمل کریں۔