عالمی منڈی میں خام تیل کی قیمتیں کہاں جا پہنچی؟

مشرق وسطیٰ میں بڑھتی ہوئی کشیدگی کے باعث عالمی منڈی میں خام تیل کی قیمتوں میں بڑا اضافہ سامنے آیا ہے جس کے بعد پیٹرولیم مصنوعات کی قیمتوں کو بھی پر لگ گئے۔
غیر ملکی خبر رساں ادارے رائٹرز کی رپورٹ کے مطابق پیر کو خام تیل کی قیمتوں میں 3 فیصد سے زیادہ اضافہ ہوا ہے، جس کے بعد برینٹ خام تیل پہلی بار اگست کے بعد 80 ڈالر فی بیرل سے تجاوز کر گیا۔

رپورٹ میں بتایا گیا کہ برینٹ خام تیل کی فیوچرز کی قیمت میں 2.88 ڈالر(3.7 فیصد) کا اضافہ ہوا اور یہ 80.93 ڈالر فی بیرل پر طے پائی جبکہ امریکی ویسٹ ٹیکساس انٹرمیڈیٹ فیوچرز میں 2.76ڈالر(3.7 فیصد) کا اضافہ ہوا اور یہ 77.14 ڈالر فی بیرل پر پہنچ گئی۔

پچھلے ہفتے برینٹ کی قیمت میں 8 فیصد سے زیادہ اور ویسٹ ٹیکساس انٹرمیڈیٹ کی قیمت میں 9 فیصد سے زیادہ اضافہ ہوا، جو ایک سال میں سب سے زیادہ تھا۔

ایران کی طرف سے اسرائیل پر میزائل حملے کے بعد خدشہ پیدا ہوا کہ اسرائیل کا ردعمل ایران کے تیل کے انفراسٹرکچر پر ہو سکتا ہے۔ اس حوالے سے اینڈریو لِپو نے کہا کہ اگر اسرائیل ایران کی تیل تنصیبات پر حملہ آور ہوتا ہے تو تیل کی قیمتوں میں مزید 3 سے 5 ڈالر فی بیرل تک کا اضافہ ہو سکتا ہے۔

ان کا مزید کہنا تھا کہ اوپیک اور اس کے اتحادی، بشمول روس جو اجتماعی طور پر اوپیک پلس کہلاتے ہیں، دسمبر سے پیداوار بڑھانے کا ارادہ رکھتے ہیں۔ تاہم ایسا صرف اس وقت ممکن ہوگا جب برینٹ خام تیل کی قیمتیں 90 ڈالریا اس سے زیادہ ہوں گی۔

یاد رہے کہ ایران اور اسرائیل کے درمیان جاری کشیدگی کے باعث مجموعی طور پر گزشتہ ایک ہفتے میں خام تیل کی قیمت میں 8 فیصد تک اضافہ ریکارڈ کیا گیا ہے

Leave a Comment