رمضان المبارک کے دوران مسجد الحرام میں تیسری توسیع کا بڑا حصہ نمازیوں کیلئے کھول دیا گیا۔
ادارہ امور حرمین نے اس حوالے سے تفصیلات فراہم کرتے ہوئے بتایا کہ تیسری توسیع کا مجموعی رقبہ 12 لاکھ 14 ہزار مربع میٹر ہے، جس میں مختلف حصوں کو نمازیوں کیلئے کھولا گیا ہے۔
رمضان میں فرض نمازوں اور تراویح کی ادائیگی کیلئے جن حصوں کو کھولا گیا ہے ان میں گراؤنڈ فلور، پہلی منزل، میزنائین، دوسری منزل اور دوسری منزل کے میزنائین کے ساتھ چھت کا حصہ شامل ہے۔ اس توسیع کے تحت مسجد میں عبادت کرنے والے نمازیوں کی سہولت کیلئے مختلف جدید انتظامات کیے گئے ہیں۔
واضح رہے کہ تیسری توسیع میں 25 ہزار قالین بچھائے گئے ہیں، تاکہ نمازیوں کو آرام دہ عبادت کا ماحول فراہم کیا جا سکے۔ مزید برآں 17 ہزار واٹر کولرز نصب بھی کیے گئے، تاکہ نمازیوں کو پانی کی سہولت فراہم کی جا سکے۔
علاوہ ازیں وضو کرنے کیلئے 11 ہزار 436 مقامات مختص کیے گئے ہیں، جبکہ 120 نماز پڑھنے کے مقامات بھی فراہم کیے گئے ہیں۔ مسجد میں 80 دروازے اور 28 لفٹیں بھی نصب کی گئی ہیں تاکہ عبادت کرنے والے افراد کو آسانی ہو۔
یاد رہے کہ مسجد الحرام کی تیسری توسیع کا حکم شاہ عبداللہ بن عبدالعزیز نے دیا تھا، اور یہ مسجد الحرام کی تاریخ کی سب سے بڑی توسیع ہے، جس کا آغاز جون 2010 میں کیا گیا تھا