کراچی کے علاوہ ملک کے باقی صارفین کے لیے بجلی سستی ہونے کا امکان ہے، سی پی پی اے نے نیپرا کو بجلی 71 پیسے فی یونٹ سستی کرنےکی درخواست کی ہے۔
سینٹرل پاور پرچیزنگ ایجنسی (سی پی پی اے) کی جانب سے ستمبرکی ماہانہ فیول ایڈجسٹمنٹ کی مد میں کمی کی درخواست نیپرا میں دائر کر دی گئی،سی پی پی اے کی درخواست پر نیپرا اتھارٹی 30 اکتوبر کوسماعت کرے گی
سی پی پی اے کے مطابق ستمبر میں 12 ارب 11 کروڑ 80 لاکھ یونٹس بجلی پیدا کی گئی، بجلی کی پیداواری لاگت 9 روپے 9 پیسے فی یونٹ رہی۔
دوسری جانب نیپرا نے کے الیکٹرک کے 7 سالہ جنریشن ٹیرف کی منظوری دے دی، نیپرا نے کے الیکٹرک کی درخواست پر فیصلہ جاری کیا۔
فیصلے کے مطابق نیپرا نے کے الیکٹرک کے جنریشن ٹیرف کی منظوری ٹیک آر پے کی بنیادوں پر دی ہے، ٹیک آر پے کا مطلب بجلی استعمال ہو نہ ہو کیپئسٹی پیمنٹ کرنا پڑے گی۔
نیپرا کے فیصلے میں ممبر ٹیرف مطہر نیاز رانا نے ٹیک آر پی کی بنیاد پر جنریشن ٹیرف دینے پر اختلافی نوٹ بھی شامل ہے، ممبر ٹیرف مطہر نیاز رانا نے ایل این جی اور ڈیزل کے پاور پلانٹس پرٹیک آر پے سے اختلاف کیا، انہوں نے کہا کہ ایل این جی اور ڈیزل کے پلانٹس پر ٹیک آر پے کراچی کےصارفین پر بوجھ پڑے گا، ممبر ٹیرف نے ایکوئٹی پر 14 فیصد ڈالر میں منافع کی بھی مخالفت کی، ممبر ٹیرف نے اس منافع کو زائد اورغیر منصفانہ قرار دیا۔
فیصلے میں کے الیکٹرک کے جنریشن ٹیرف ڈیزل پر 44.33 روپے سے لیکر 50 روپے 75 پیسے فی یونٹ تک منظوری دی گئی، ایل این جی پر جنریشن ٹیرف 20 روپے 67 پیسے سے 41 روپے 75 پیسے فی یونٹ تک منظور کیا گیا، فرنس آئل پر جنریشن ٹیرف 33 روپے 31 پیسے سے 34 روپے 64 پیسے فی یونٹ تک مقرر کیا گیا اور گیس پر فی یونٹ جنریشن ٹیرف 6 روپے 83 پیسے سے 9 روپے 62 پیسے تک مقرر کیا گیا ہے۔
واضح رہے کہ جہاں ایک جانب بجلی صارفین کو معمولی ریلیف دیا جانے کی درخواست دائر کی گئی ہے تو دوسری جانب شہر قائد کے باسیوں پر مزید بوجھ ڈالنے کی منظوری دے دی گئی ہے