امریکی ٹیکنالوجی کمپنی ایپل نے 9 ستمبر کو آئی فون 16 سیریز کے ساتھ دیگر نئی پروڈکٹس کو متعارف کرایا تھا۔
نئی سیریز میں شامل ماڈلز میں آئی فون 16، آئی فون 16 پلس، آئی فون 16 پرو اور آئی فون 16 پرو میکس شامل ہیں۔ یہ نئے ماڈلز 20 ستمبر سے مارکیٹ میں دستیاب ہیں۔
آئی فون 16 سیریز کی قیمتیں:
غیرملکی میڈیا رپورٹس کے مطابق، آئی فون 16 پرو کی قیمت 999 ڈالرز جبکہ پرو میکس کی قیمت 1199 ڈالرز سے شروع ہوتی ہے۔ ایپل کے مختلف ماڈلز کی قیمتیں ان کی اسٹوریج کی بنیاد پر بھی مختلف ہوتی ہیں، جن میں 256GB، 512GB اور 1TB کے ویرینٹس شامل ہیں۔
پاکستان میں آئی فون 16 کی قیمتیں:
پاکستان میں آئی فون 16 سیریز کے ماڈلز کی قیمتیں ایپل کے مجاز ڈسٹری بیوٹر مرسینٹائل کی ویب سائٹ پر دستیاب ہیں۔ ویب سائٹ کے مطابق آئی فون 16 پرو کی قیمت 4 لاکھ 60 ہزار سے شروع ہوکر 6 لاکھ 58 ہزار روپے تک پہنچتی ہے، جس کا انحصار اسٹوریج ویرینٹس پر ہے۔
آئی فون 16 کی قیمت 3 لاکھ 69 ہزار سے لے کر 4 لاکھ 85 ہزار تک ہے جبکہ آئی فون 16 پلس 4 لاکھ 7 ہزار 500 روپے سے شروع ہوکر 5 لاکھ 24 ہزار تک جاتا ہے۔
پی ٹی اے ٹیکس اور رجسٹریشن کی تفصیلات:
موبائل فونز سے متعلق معلومات فراہم کرنے والی ویب سائٹ ’فون ورلڈ‘ کے مطابق، پاکستان میں آئی فون 16 سیریز کے ماڈلز کو پی ٹی اے سے رجسٹر کرانے کے لیے صارفین کو اضافی ٹیکس ادا کرنا ہوگا۔ مرسینٹائل کے فراہم کردہ آئی فونز میں پی ٹی اے ٹیکس پہلے سے شامل ہوتا ہے۔
صارفین پی ٹی اے ٹیکس دو طریقوں سے ادا کرسکتے ہیں: شناختی کارڈ کے ذریعے یا پاسپورٹ کے ذریعے۔ پاسپورٹ کے ذریعے ٹیکس ادائیگی کم ہوتی ہے، تاہم اس کے لیے حالیہ سفر کی تاریخ کا ثبوت فراہم کرنا ضروری ہوتا ہے۔