چیئرمین پاکستان بلائنڈ کرکٹ کونسل سید سلطان شاہ کا کہنا ہے کہ پاکستان ٹی ٹونٹی ورلڈکپ کی میزبانی کے لئے پوری طرح تیار ہے، بھارت کو کھیل میں سیاست کو نہیں لانا چاہئے۔ انہوں نے دو ٹوک اعلان کرتے ہوئے کہا کہ 2025ء کے ویمنز بلائنڈ ورلڈکپ میں پاکستان ٹیم بھارت نہیں جائیگی اور ورلڈ بلائنڈ کرکٹ کونسل میں ہم بھارت کی میزبانی کے خلاف اور ایونٹ کو نیوٹرل وینیو پر لے جانے کی تحریک پیش کریں گے تاکہ پاکستان ٹیم ایونٹ میں شرکت کر سکے۔ہماری بھی اُتنی عزت ہے جتنی بھارت کی ہے۔
انہوں نے کہاکہ بھارت کو کھیل میں سیاست کو نہیں لانا چاہیئے۔ بھارت نے اپنا رویہ نہیں بدلا تو اگلے سال بھارت میں ہونےوالا ویمنز بلائنڈٹی ٹونٹی ورلڈکپ میں اپنی ٹیم نہیں بھیجیں گے اور ورلڈبلائنڈ کرکٹ کونسل میں ایونٹ کو بھارت سے کسی نیوٹرل مقام پر لے جانے کی تحریک پیش کریں گے۔
ورلڈکپ کی تیاریوں پر سید سلطان شاہ نے کہا کہ گزشتہ ایک سال سے ورلڈکپ کی تیاری کررہے تھے اور پاکستان بلائنڈ ٹی ٹوئنٹی ورلڈکپ کی میزبانی کے لئے تیارہے، حکومت سمیت تمام سکیورٹی ادارے ہمیں سپورٹ کر ر ہے ہیں، امید کرتے ہیں کہ ایونٹ اچھا رہے گا۔
انہوں نے کہا کہ پاکستان بلائنڈ ٹیم دنیا کی نمبر ون ٹیم ہے۔ بھارتی رویے پر چیئرمین پاکستان بلائنڈ کرکٹ کونسل کا کہناتھا کہ 2014ء کے بعد سے بھارت کی نئی حکومت آئی ہے جو ہرمیدان میں پاکستان کیخلاف کام کررہے ہیں۔ بھارت بڑا معاشی ملک ہے مگر اس کا یہ مطلب نہیں کہ آپ کسی کی خودداری کو ٹھیس پہنچائیں اور کھیل جو کہ پوری دنیا کے لوگوں کو یکجا کرتا ہے اور امن کا پیغام دیتا ہے اس میں سیاست کو لانا غیر مناسب ہے