آئی سی سی چیمپئنز ٹرافی 2025ء کے انعقاد سے قبل پاکستان کرکٹ بورڈ (پی سی بی) کے چیئرمین محسن نقوی کی بھارتی بورڈ کے سیکریٹری اور انٹرنیشنل کرکٹ کونسل کے سربراہ جے شاہ سے ملاقات متوقع ہے۔ میڈیا رپورٹس کے مطابق دونوں آفیشلز اکتوبر میں آئی سی سی ویمنز ٹی 20 ورلڈکپ کے فائنل میچ کے دوران ملاقات کریں گے، جو اگلے ماہ متحدہ عرب امارات میں شیڈول ہے۔
دریں اثنا، رپورٹس میں انکشاف کیا کہ پاکستان کرکٹ بورڈ لاجسٹک انتظامات کی تصدیق کیلئے چیمپئنز ٹرافی کے شیڈول کی حتمی منظوری کا انتظار کررہا ہے۔ آئی سی سی حکام کے ساتھ حالیہ میٹنگ میں پی سی بی نے ایونٹ کی تیاریوں کو یقینی بنانے جلد از جلد شیڈول فائنل کرنے پر زور دیا تھا۔
آئی سی سی کی جانب سے اکتوبر کے آخر تک شیڈول کے حوالے سے باضابطہ اعلان متوقع ہے۔
واضح رہے کہ 2008ء کے بعد سے ابتک بھارتی ٹیم نے پاکستان کا سفر نہیں کیا اور مختلف بہانے بناکر متعدد ایونٹس سے راہِ فرار اختیار کرتا رہا ہے جبکہ دونوں ٹیموں نے 2007ء کے بعد ٹیسٹ میچز نہیں کھیلے جب کہ 13-2012ء میں آخری بار باہمی ون ڈے اور ٹی ٹونٹی سیریز کھیلی تھی۔ دوسری جانب ورلڈکپ 2023ء کیلئے پاکستان نے بھارت کا رخ کیا تھا تاہم چپمپئنز ٹرافی کی میزبانی پاکستان کے پاس ہے جبکہ بھارتی بورڈ اپنی ٹیم بھیجنے سے انکار کررہا ہے جس کے باعث ایونٹ کا شیڈول تاحال منظر عام پر نہیں آسکا ہے۔
چیمپئنز ٹرافی سے قبل محسن نقوی اور جے شاہ کی ملاقات کا امکان
