شہر قائد کے علاقے کلفٹن میں پیش آنے والے ایک المناک ٹریفک حادثے میں ایم کیو ایم پاکستان کی رکن قومی اسمبلی رعنا انصار کا بیٹا، سید شاہ زیب، جاں بحق ہو گیا۔
یہ حادثہ کلفٹن انڈر پاس کے قریب پیش آیا جب شاہ زیب کی گاڑی بے قابو ہو کر فٹ پاتھ سے جا ٹکرائی۔ حادثے میں شاہ زیب کو سر پر شدید چوٹیں آئیں، جو اس کی موت کا سبب بنیں۔
حادثے کے وقت شاہ زیب گاڑی چلا رہا تھا، اور اس کے ہمراہ اس کا دوست محمد الیاس بھی موجود تھا، جو حادثے میں زخمی ہوا۔ پولیس حکام کے مطابق گاڑی تیز رفتاری کے باعث حادثے کا شکار ہوئی، جس کے نتیجے میں یہ افسوسناک واقعہ پیش آیا۔
حادثے کے بعد فوری طور پر پولیس اور امدادی ٹیمیں جائے وقوعہ پر پہنچیں، تاہم شاہ زیب کی موت واقع ہو چکی تھی۔ محمد الیاس کو زخمی حالت میں ہسپتال منتقل کر دیا گیا۔
پولیس کے مطابق شاہ زیب کے اہلخانہ نے قانونی کارروائی سے گریز کیا اور حادثے کو ذاتی معاملہ قرار دے دیا۔ ضابطے کی کارروائی مکمل کرنے کے بعد شاہ زیب کی لاش ان کے اہلخانہ کے حوالے کر دی گئی۔
شاہ زیب کی نماز جنازہ آج بعد نماز عشاء ادا کی جائے گی، اور اہلخانہ نے اس حادثے پر گہرے غم اور صدمے کا اظہار کیا ہے