باجوڑ میں کرکٹ فیسٹیول کے فائنل میں ٹیموں اور حامیوں کا جھگڑا ہوگیا، جس میں ایک شخص جاں بحق اور 3 زخمی ہوگئے۔ زخمیوں میں ڈی ایس پی باجوڑ بھی شامل ہیں۔
باجوڑ سپورٹس کمپلیکس میں کرکٹ کے فائنل میچ میں جھگڑا ہوا، جس کے بعد ہاتھا پائی ہوئی اور کرسیاں چل گئیں، جس میں ایک شخص جاں بحق ہوگیا۔
کھلاڑی اور تماشائی ایک دوسرے پر لاتیں، گھونسے اور کرسیاں مارتے رہے، مشتعل شائقین وی آئی پی انکلوژر میں داخل ہوگئے اور شیشے توڑ دیے۔
پولیس کے مطابق جھگڑا کھلاڑی کو آؤٹ قرار دینے پر ہوا، ڈی پی او کا کہنا ہے 6 ملزمان گرفتار کرلیے گئے ہیں۔
ایف سی اور باجوڑ پولیس کے جوانوں نے حالات کو کنٹرول کیا اور زخمیوں کو اسپتال منتقل کردیا گیا جبکہ جھگڑے کے باعث میچ روک دیا گیا۔
بعد ازاں سٹیڈیم سے تماشائیوں کو نکال کر خالی کیا گیا اور حالات کو کنٹرول کرلیا گیا، جاں بحق شخص کی شناخت فضل واحد عبد الطیف عمر 50 سال سکنہ نیاگ ماموند ضلع باجوڑ کے نام سے ہوئی ہے۔