پاکستان شماریات بیورو نے ہفتہ وار مہنگائی کی رپورٹ جاری کر دی ہے، جس کے مطابق ملک میں مہنگائی کی شرح میں ہفتہ وار بنیادوں پر 0.10 فیصد کی معمولی کمی واقع ہوئی ہے۔
تاہم سالانہ بنیادوں پر مہنگائی کی شرح 16.69 فیصد تک پہنچ گئی ہے۔
21 اشیاء کی قیمتوں میں اضافہ:
رپورٹ کے مطابق، ایک ہفتے کے دوران 21 اشیاء ضروریہ کی قیمتوں میں اضافہ ہوا۔ خاص طور پر انڈوں کی فی درجن قیمت میں 17 روپے 40 پیسے کا اضافہ دیکھا گیا ہے۔
اس کے علاوہ دال چنا کی قیمت میں بھی 20 روپے 19 پیسے فی کلو اضافہ ہوا ہے، جبکہ آلو کی فی کلو قیمت میں 2 روپے 40 پیسے اضافہ ریکارڈ کیا گیا ہے۔
9 اشیاء کی قیمتوں میں کمی:
رپورٹ کے مطابق، ایک ہفتے کے دوران 9 اشیاء ضروریہ کی قیمتوں میں کمی ہوئی ہے۔ خاص طور پر ٹماٹر کی قیمت میں 34 روپے 8 پیسے فی کلو کی کمی دیکھی گئی، جبکہ 20 کلو آٹے کا تھیلا 51 روپے 37 پیسے سستا ہوا ہے۔ اسی طرح چینی کی قیمت میں 2 روپے 9 پیسے فی کلو کی کمی ہوئی ہے۔
21 اشیاء کی قیمتیں مستحکم:
رپورٹ میں یہ بھی بتایا گیا ہے کہ چائے، گیس اور بجلی چارجز سمیت 21 اشیاء کی قیمتیں مستحکم رہیں۔ ادارہ شماریات کی رپورٹ میں مزید بتایا گیا ہے کہ گزشتہ ہفتے کیلے فی درجن 3 روپے سستے ہوئے، جبکہ دال مسور، دال مونگ اور بریڈ کی قیمتوں میں بھی کمی دیکھنے میں آئی۔
مہنگی ہونے والی اشیاء:
ادارہ شماریات کے مطابق، ایک ہفتے کے دوران تازہ دودھ، لہسن، دال ماش اور دہی کی قیمتوں میں اضافہ ہوا ہے۔ ایل پی جی کا گھریلو سلنڈر، گڑ، مٹن اور بیف کی قیمتیں بھی بڑھ گئی ہیں