نیوزی لینڈ کے بیٹر چیڈ بوس نے تیز ترین ڈبل سنچری کا ورلڈ ریکارڈ قائم کردیا۔ چیڈ بوس نے لسٹ اے کی تیز ترین ڈبل سنچری کا ریکارڈ اپنے نام کیا، انہوں نے نیوزی لینڈ ڈومیسٹک کرکٹ کی ون ڈے ٹرافی میں کنٹر بری کی جانب سے کھیلتے ہوئے 103 گیندوں پر ڈبل سنچری مکمل کی۔ چیڈ بوس نے ٹریوس ہیڈ اور نرائن جگادیسن کا 114 گیندوں پر ڈبل سنچری کا ریکارڈ توڑا۔
ٹریوس ہیڈ نے 22-2021ء کے مارش کپ میں کوئنز لینڈ کے خلاف جنوبی آسٹریلیا کے لیے یہ کارنامہ انجام دیا تھا جبکہ تامل ناڈو کے جگدیسن نے 2022ء کی وجے ہزارے ٹرافی میں اروناچل پردیش کے خلاف اپنے ریکارڈ 277 رنز بنانے کے دوران یہ کارنامہ انجام دیا تھا۔
فورڈ ٹرافی کا یہ میچ کنٹری بری اور اوٹاگو وولٹس کے درمیان ہیگلے اوول میں کھیلا گیا۔
کنٹری بری نے پہلے کھیلتے ہوئے 50 اوورز میں 9 وکٹوں پر 343 رنز بنائے جس میں چیڈ بوس نے 205 رنز کی اننگز میں 7 چھکے اور 27 چوکے لگائے جب کہ اس کے مقابلے اوٹاگو کی ٹیم 103رنز بنا کر آوٹ ہوگئی۔ واضح رہے کہ چیڈ بوس 6 ون ڈے اور 11 ٹی ٹوئنٹی میچز میں نیوزی لینڈ کی نمائندگی کرچکے ہیں اور لسٹ اے کرکٹ میں 99 میچز کھیل چکے ہیں۔