پاکستان تحریک انصاف کے رہنما علی محمد خان نے اعلان کیا ہے کہ 8 ستمبر کو ہونے والا جلسہ کسی صورت ملتوی نہیں ہوگا۔
میڈیا سے گفتگو کرتے ہوئے انہوں نے کہا کہ بانی پی ٹی آئی نے جلسہ صرف ختم نبوت کے اہم مسئلے کی وجہ سے موخر کیا تھا، جب اسلام آباد میں مذہبی جماعتیں موجود تھیں اور حکومت نے این او سی منسوخ کر دیا تھا۔
علی محمد خان نے کہا کہ عمران خان صرف ایک سیاست دان نہیں بلکہ ایک لیڈر ہیں اور انہوں نے کل حکومت اور ریاست کو ایک موقع اور دیا ہے۔
انہوں نے بتایا کہ بانی پی ٹی آئی نے کہا کہ ان کا جیل سے باہر آنا صرف اللہ کے ہاتھ میں ہے اور گذشتہ ایک سال میں انہوں نے چار مرتبہ قرآن پاک کو تفسیر کے ساتھ پڑھا ہے۔
انہوں نے مزید کہا کہ 8 ستمبر کا جلسہ کسی صورت موخر نہیں ہوگا اور عمران خان پاکستان کی ترقی کے خواہاں ہیں۔ نو مئی کے احتجاج کو انہوں نے پر امن قرار دیا اور کہا کہ ہمارے احتجاج کو تشدد میں تبدیل کرنے کی منصوبہ بندی کی گئی تھی۔
علی محمد خان نے کہا کہ عمران خان چاہتے ہیں کہ پاکستان ترقی کرے اور اچھے دن جلد آئیں گے